Tresmaswr yn cael ei garcharu ar ôl achosi aflonyddwch torfol

Mae Network Rail yn rhybuddio am beryglon y rheilffordd wrth i dresmaswr gael ei garcharu ar ôl achosi aflonyddwch torfol

Mae Network Rail yn atgoffa’r cyhoedd o’r peryglon sy’n gysylltiedig â thresmasu ar y rheilffordd ar ôl i ddyn ddringodd ar ben twnnel yn edrych dros linellau rheilffordd ger gorsaf St. Pancras International, gan rwystro trenau rhwng Llundain, Caint a Ffrainc, gael ei garcharu.

Dringodd Terry Maher, 44 oed, o Cubitt Street, ar y twnnel, sy’n eiddo i Network Rail, gyda baner San Siôr, banciau pŵer ar gyfer ei ffôn a dillad cynnes, ac arhosodd yn yr ardal hynod beryglus am 13 awr.

Fe wnaeth ei weithredoedd atal trenau cyflym rhag teithio i’r de ddwyrain a Ffrainc, gan darfu ar filoedd o gymudo ac oedi gwyliau. Cafodd cyfanswm o 88 o drenau eu canslo, ac effeithiwyd yn uniongyrchol ar tua 22,000 o bobl, bu oedi, anghyfleustra neu bu’n rhaid iddynt roi’r gorau i’w cynlluniau teithio. Roedd teithwyr rhyngwladol, oedd yn bwriadu teithio ar yr Eurostar o St. Pancras, yn sownd dros nos yn Llundain. Amcangyfrifir y bydd yr amhariad yn costio mwy na £1 miliwn.

Cafwyd Maher yn euog o rwystro’r rheilffordd yn faleisus a chafodd ei ddedfrydu i flwyddyn yn y carchar yn Llys y Goron Blackfriars ddydd Llun 12 Awst.

Mae Network Rail, Heddlu Trafnidiaeth Prydain a’r diwydiant rheilffyrdd ehangach ar hyn o bryd yn cynnal ymgyrch genedlaethol dros yr haf i dynnu sylw at beryglon tresmasu, sy’n targedu pobl ifanc. Mae’r rheilffordd yn llawn peryglon cudd ac amlwg – mae’r trydan bob amser yn cael ei droi ymlaen – ac mae tresmaswyr mewn perygl o anaf difrifol sy’n newid bywyd neu hyd yn oed farwolaeth.

Dywedodd Allan Spence, pennaeth diogelwch y cyhoedd a theithwyr Network Rail: “Mae unrhyw weithred o dresmasu nid yn unig yn hynod beryglus i’r unigolyn dan sylw, ond hefyd yn tarfu’n fawr ar deithwyr sydd eisiau mynd adref, i weithio, i apwyntiadau ysbyty neu i cwrdd â ffrindiau a theulu.

“Mae dyfarniad y llys yn adlewyrchu difrifoldeb gweithredoedd y dyn hwn, a dylai fod yn rhybudd i unrhyw un sy’n cael ei demtio i dresmasu ar y rheilffordd – hyd yn oed os ydyn nhw’n llwyddo i osgoi anaf personol, maen nhw mewn perygl o ddedfryd hir o garchar.”

Meddai’r Swyddog sy’n ymchwilio, y Ditectif Ringyll Dean Percival: “Mae hwn wedi’i ddisgrifio fel y digwyddiad unigol mwyaf costus yn hanes rheilffyrdd cyflym ym Mhrydain.

“Fodd bynnag, nid yn unig fe gostiodd i’r diwydiant rheilffyrdd, fe gostiodd hefyd i filoedd o gymudwyr a theithwyr o’u hamser, gan ohirio eu teithiau’n sylweddol a’u gadael yn sownd mewn gorsafoedd yn ysu am i’r sefyllfa gael ei datrys.

“Cafodd gweithredoedd hunanol Maher effaith ddofn ar fywydau beunyddiol y cyhoedd; yr effaith honno y daethpwyd ag ef i’r llys i ateb amdani.”